#GrailReads
Ang Hari Ng Komyut: Ang Pagkilala
ni Lizette Daluz

Ang Hari ng Komyut ay isang pagsilip sa mga pang araw-araw na kwento ng pagiging Pilipinong komyuter. Kasama ang ating bidang hari, nararamdaman natin ang hirap, saya, at kawirdohan ng pagiging komyuter dito sa Pilipinas.

Sa simpleng art style, pangkaraniwang salita, at mga maiikling eksena, madaling mailalagay ng mambabasa ang sarili niya sa posisyong ‘Hari ng Komyut’. Lahat ng pinagdaanan ng hari ay maaring napagdaanan mo na rin. Imbes na ‘maghari-harian’ at unahin ang pansariling kapakanan, hinahamon ng libro ang ibig sabihin ng pagiging hari — na ang mga tunay na hari ng komyut ay ang mga payak, madiskarte, maunawain, at higit sa lahat, mapagkumbabang mga Pilipino.

Hindi madali ang pagkokomyut sa Pilipinas. Madalas ay isa itong matinding pagsubok na araw-araw hinaharap ng milyun-milyong Pilipino. Pero kung lahat tayo ay may puso at utak na gaya ng Hari ng Komyut, mas mapapadali natin ang biyahe para sa isa’t-isa.

Rebyu ni Drei Cortez

Ang Hari ng Komyut: Ang Pagkilala ay ipinublish ng Anino Comics (@aninocomics) at maaring mabili sa piling mga bookstores at comic shops.

This post originally appeared in the UP Grail Instagram Account @upgrail
#GrailReads is an initiative that had UP Grail members review comics.